Sheekh
Atam waxaa uu magaciisu soo shaac-baxay sanadkii 2010 xilligaas oo
ciidamo uu hogaaminayo ay dagaal adag la galeen Maamulka Puntland oo uu
Sheekh Atam ku tilmaami jiray inay yihiin Ashahaado-ladirir, waxaana uu
sheegi jiray inuu Jihaad fii-sabiili-llaah kula jiro maamulkaas cadawga
ah ee ay Gaaladu soo dhoodhoobtay, balse waxaa layaab noqotay in Sheekh
Atam uu maamul midka Puntland kasii xun oo ay gaalo cadaan iyo madoow
leh garwadeenno iyo guulwadayaal kayihiin uu iskusoo dhiibo, weliba uu
is-dhiibitaankiisa kaga dhawaaqo Xarunta wasaarada warfaafinta oo ay
ilaalo ka yihiin taangiyada ciidamada gaalada ah ee AMISOM!!!.
Sheekh
Atam waxaa uu sheegay in Shabaab-ka uu kasoo tegay ay shacabka ku
xukumaan shareecada Islaamka, balse madaxdooda gaar ahaan
hogaamiyahoodu, Sheekh Abu Zubeyr, aysan Shareecadu qabanin uunan u
hogaansamin "waa sida uu hadalka u yiri”, balse Sheekh Atam waxaa uu
qirsanyahay inuu kasoo tegay dhul shareecada Islaamka lagu maamulo oo
calanka Tawxiidku saaranyahay, goobta uu fadhiyo oo uu hadalkaas ka
sheegayana waa goob ay gaalo haysato , shareecada Qaramada midoobayna
lagu maamulo, nimanka madaxda ka ahna ay yihiin niman Murtadiin ah, sida
uu isaguba sheegi jiray. Waa yaab!!!.
Sida
ay ii sheegeen dad aad ugu dhow Sheekh Atam, wadaad-ku wuxuu sanadihii
lasoo dhaafay ku noolaa Degmada Kuntuwaareey ee Wilaayada Shabeellada
Hoose, halkaas oo uu beer ka tacban jiray, waa goob ammaan ah oo dadku
ay naftooda iyo maalkooda kula nabadgaleen - sida Muslim iyo gaal-ba
isla qirsanyihiin, hase-yeeshee marka laga soo tago degmadaas ee dhowr
Kiilomitir lasoo socdo lana soo gaaro Shalaambood, waxaa bilaabanaysa
cabsi iyo walbahaar, waxaa wadada daadsan maydadka maleeshiyada dowlada
oo qaab qabiil isku laynaysa, shalay oo kaliya waxay iska dileen 12 sida
masuuliyiintooda ay sheegeen, waxaa wadada yaalla maydadka dumar
masaakiin ah oo ay maleeshiyadu qabiil ahaan u xasuuqday, waxaa bilqan
isbaarooyin hantida Muslimiinta lagu dhoco dumarkana lagu kufsado,
intaas oo dhan ma aha wax aan anigu maankayga kasoo hindisay ee waa wax
bulshadu ka wada dheregsantahay warbaahintuna hadal-hayso, sidaas oo ay
tahay Sheekh Atam dhaleeceeyn iyo aflagaado ayuu Mujaahidiinta kala
dul-dhacay, Murtadiintana mahadcelin ayuu ku maamuusay. Waa yaab!!!.
Sheekh
Atam waxaa uu sheegay inuu ka tanaasulay Jihaadkii hubaysnaa, wixii
hada ka dambeeyana uu fikirkiisa kusoo gubdisan doono qaab nabadeed,
halkaas waxaa ka cad in wadaadku uu u hogaansamay rabitaankii cadawga ee
ahaa in dadka Soomaaliyeed ay is-dhiibaan, hubkana dhigaan, kadibna
sidii doono laga yeelo, waa dhagar dad badan oo Muslimiin ah hore loogu
soo dhagray, welina albaabkaasi waa furanyahay, balse ilaa hadda qof
albaabkaas galay oo guul ka keenay lama sheegin. Waa yaab!!!.
Anigu
aqoon uma lihi Sheekha, waxaanse xog ku helay in Jabhadii uu Sheekh Atam
mar hogaamiyaha ka ahaa ay weli wadadii Jihaadka ku taagantahay, waxaa
ay si toos ah u hoostagtaa maamulka sare ee Mujaahidiinta, waxaan ku
ammaanayaa hogaanka Xarakada Al-Shabaab inuu Ilaahay waafajiyay inay
masuuliyada Jabhadaas iyo maamulkeeda mar hore kala wareegeen Sheekh
Atam, una dhiibeen gacmo aamin ah Insha,Allah. Waxaa maanta fajaciso
ummada Soomaaliyeed ku noqon lahayn in Sheekh Atam uu Mujaahidiintaas
ugu gacan-geliyo maamullada Ashahaado la dirirka ah ee Itoobiya looga
taliyo ee ka kala dhisan Garoowe iyo Muqdisho.
Wadada
halganku waa mid aad u dheer, aadna u dhib badan, qof walba oo kamid ah
ragga halgamayana yool ayuu leeyahay, qaar baa yoolkoodu wuxuu yahay
inay dhal-dhalaal adduun helaan sida madaxtinimo iyo maamuus sare, qaar
kale waxaa uu yoolkoodu yahay inay Allaah raali ahaanshihiisa gaaraan,
Shareecada Islaamka hirgeliyaan, Calanka Jihaadkana sare u qadaan,
waxaan rajaynayaa inta badan hogaanka Mujaahidiintu ay sidaas yihiin,
balse kuwa yar ee laga yaabo inay dano gaar ah oo adduun ku kooban
leeyihiin waxaan leeyahay ku waana-qaata Shariif Sheekh Axmad iyo halkii
uu ku dambeeyay. Waa dhalaal aduunyo oo aad u yar, kadibna dhibaato
aakharo oonan dhammaad lahayd.
W/Q Cumar Xabiib
FG:Fikirka qoraaga ayuu gaar u yahay