Kumannaan ruux o ku dhaqan caasimadda ayaa imaanshaha Igad ku waayay
shaqooyinkoodii iyo wax barashadoodii kadib markii ciidamada shisheeye iyo kuwa
dowladdu xannibeen wadooyinkii lagu socdaalo lahaa oo ay ugu horeyso tan Maka
Al-mukarama oo marin u ah jaamacado iyo iskuulo badan.
Ma ahan wax cusub in madax shisheeye ay tagaan magaalada Muqdisho kuna
shiraan Xalane, Madaarka, Madaxtooyo iyo meelo lamid ah oo ay ku hareereysan
yihiin dhagxaan iyo ciidamo fara badan oo ku hubeysan Kaarayaal. Balse su'aasha
is weydiinta mudan ayaa waxay tahay, maxaa ururka Igad oo heli karay dalal amni
u ah oo ay ku shiraan ku khasbay iney magaalada Muqdisho isku soo biimeeyaan?.
Dhowr arimood oo jira awgood ayey ila tahay in arrintan ay sababeen,
waa midda kowaade, in beesha caalamka oo ka niyad jabtay hawl galka Amisom iyo
ammaanka magaalada Muqdisho loo muujiyo in xaaladdu caadi tahay, in niyadda loo
dhiso madaxda ciidamada shisheeye ee ku sugan magaalada Muqdisho, in askarta
Amisom lala qeybsado murugada xanuunkii ku gaaray weerarkii Xalane iyo in
shacabka magaalada Muqdisho loo muujiyo in gumeystuhu wali nool yahay.
Shirkan Igad ayaa waxaa xigi doona socdaal ay isku ujeedo yihiin oo uu
isna magaalada Muqdisho ku imanayo madaxweynaha dalka Turkiga.
Weerarkii ay Xarakada Mujaahidiinta Al-Shabaab ku qaadeen xerada Xalane
bishii lasoo dhaafay wuxuu culeys weyn ku keenay madaxda dalalka soo diray
ciidamada shisheeye, waxaana tusaale loo soo qaadan karayaa warkii kasoo baxay
wasaaradda gaashaandhigga Uganda ee ahaa inaan wax mag dhow ah laga siin
askarta uga dhimatay Soomaaliya oo ay ugu dambeeyeen sideed looga dilay
weerarkii Xalane.
Arimahan iyaga ah ayaa wasiirada arimaha dibadda Igad ku kallifay iney
nafsadooda keenaan magaalada Muqdisho iyagoo u bareeray khatar ammaan maadaama
uu wali sii muuqdo dhiiggii ka daatay madax cadaan iyo madow isugu jira oo
dharaar cad loogu galay Xerada Xalane. Igad waxay ku sifoobeen maahmaahdii
Soomaaliyeed ee ahayd (ilowsho dhawaa ma umul baa) Bal aan aragno wuxuu soo
kordhiyo shirka dicaayadda Xambaarsan ee IGAD.
Qore Jaamac Dhoorre.